| 我相信近日都有好多專業影評review左Avatar架啦，我都無謂講太多啦，首先，我唔專業，二來，我有bias。但當我睇Avatar的時候，我的腦海裡不斷浮現MJ的This is it，因為佢地都有一個共通點，就係愛護我地住緊、生活緊的星體。
我好欣賞近年Hollywood人對環保的追求，佢地不問回報去帶一個正面訊息比大家，地球就快玩完啦，你地要好好珍惜。其實我覺得利用電影作呢個訊息的傳播媒介，係好醒的，電影院裡trap住所有人，根本無機會比佢地思考，而強加訊息入腦。但係離開電影院後，又會有幾多人會真正思考電影的message呢？
我地生於現世代的年青一族，了解到上幾代是因為努力工作，共建家園，而產生重工業的後遺症，我地而家就享受緊高科技帶來的方便，又會有幾多人諗到有方便，自然就有承擔呢？我希望各位努力關注環保，想繼續方便，就要付出少少。好簡單的，你我都會做到。例如，飲用完的膠水樽，記得拋入回收箱，(我知！香港政府係呢方面根本無support，所以我次次都會帶D吉樽返屋企樓下先拋入回收箱，雖然麻煩D，但事後感覺良好，好似為環保出左好多力咁，嘻嘻！)另外，少D染髮啦，都會幫到手架啦。節約用紙啦，又會幫到手架啦。買少件衫囉，慳錢又環保。其實，我地每個人只要做少少，就已經超級環保。就等如生意佬話係大陸做生意，賺一人一蚊，都會賺到十二億啦，同一道理。
近日，果D國家搞埋D乜鬼climate change conference，未傾點數(錢$$$)，我地已經死哂啦，自己出下力，仲好啦。
http://www.timeforclimatejustice.org/
我真心希望N年後，我地唔駛去果D乜鬼星，搶人地D乜鬼樹，咁樣又唔型，又樣衰。地球人，應該proud of自己的星體的。咁係啦，我地咁靚，又有衫著。哈哈！
|
| |
| 天氣悶熱，友人相約我到Salon剪髮。 髮型師見到了我一頭長至及腰的頭髮都嚇了一跳，直問我「幾耐無剪頭髮？」，我答「3、4個月囉！自從那個『阿嬌』頭*」。髮型師回應了一下「噢！」，我問「剪幾多好呢？」，髮型師答「2、3吋啦！修剪那些髮尾開叉部份」，我說：「好的！」。我再問「剪短D，好唔好呢？例如剪到膊頭位置」，友人聽到的回應是「咁激！好短喎！」。這個反應正好代表我已有一段長時間未試過短頭髮，近2年都是長髮。我訴說「天氣好熱，搞到我日日都師姑頭出街，好老土！」，髮型師此時已雙眼發光「剪短？係一件好事，會好爽的！」。於是就動刀剪髮，我覺得髮型師已有一段時間未讓佢由長髮剪至短髮，所以佢表現得非常雀躍，我就眼見好多頭髮散落至地上。過了一小時的修剪工程，頭輕了好多，頭髮少了好多，整體舒服了好多。效果不錯，起碼自己中意呢！據我的手感估計，我剪短了一呎頭髮！ 以下就是我剪掉的頭髮其中一部分：  (「阿嬌」頭：因為她那個Tough頭，好鬼靚，我都走左去電了一頭長曲髮) |
| |
| 因為曾經做過美國電影發行公司，所以亦有機會參與過「改片名」呢個指定的宣傳工作。我覺得改片名係一個幾好玩的工作，又高難道，又考智慧，又要有市場觸角。所以每當我改完一個片名，而觀眾又接受的話，真係好有滿足感，比每個月收到那份雞碎咁多的糧，更有滿足感。 我曾經改過的片名有The Passion of Christ 《受難曲》、Sideways《酒佬日記》、Borat《波叔出城：哈薩克鄉下佬去美國搵著數》、Choke《窒色》等。從片名中可見，我改親都係D細片種，即係上一、兩間戲院果D呢。好明顯我係難登大廳，又或者反映出我對主流電影的不參與政策。主流電影的改片名工作，有主流人士的參與，而且仲要係江湖上出色的創作人，他們大多是市場上的老行尊，我亦曾經因為改片名受過老行尊的教訓，老行尊話：「你寫呢D係比自己睇下就算啦！」。我又覺得佢講得好有道理，但我又好膽粗粗咁回應：「咁我都係寫下，唔小心比你睇到，真係唔好意思。」。 在行內，我最欣賞改片名的人是「娥姐」，佢真係創意無限，而且次次都有新野。最近，我就好中意佢改的Slumdog Millionaire《一百萬零一夜》，盡表達出故事奇妙神奇之處，又能帶出電影的主線，而且仲有吸引力，話哂贏左百萬富翁嘛，有邊個唔想先？她過往的作品有Mr. and Mrs. Smith《史密夫決戰史密妻》，呢個片名，當年讚到飛起啦。另外，有一個我都好中意的是Swing Girls《喇叭書院》，好有我發育期的情懷。過往，同娥姐的合作，真的好開心，佢又時常接受新意見，又會不厭其煩地教育我地呢D字都唔識多隻，又要膽粗粗改片名的人。 改片名呢個方案，真係又過癮，但又非常頭痕的工作。 |
| |
| 自從離職後，我的生活習慣就起了變化。 首先，放蹤地，到自然醒先起身。(但實際睡眠時間可能只有6小時，對我而言，已經好放蹤啦，對比過往的長期失眠！） 其次，就是不更換睡衣，整天賴在床上，但並非做大懶蟲！為了讓大家清楚知道箇中的奧妙，唯有花點筆墨解釋一下我的房間設計。我的房間大約有90平方呎大(對於一間只有600平方呎的香港市區樓，尚算可以啦)，長方形的房間，房門靠在一邊，由門口直入房內，與房內最長的一幅牆剛好打個照面，再逆時針轉90度，就有一面大窗，而我把一張4呎乘6呎的單人床安放在窗下，所以開窗關窗都要在床上進行，接下來就是一個8呎長乘8呎高乘2呎深的大衣櫃，它靠房內那幅最長的牆而建，所以一開門就會見到一個大衣櫃。餘下的就是房間中間那塊5呎乖8呎的寶貴地皮，由於我實在好珍惜那塊可以讓我轉身、跳步的小地皮，我決意放棄書檯。把LCD montinor 安裝在靠近窗，剛好於枕頭對立的牆上，把5.1 speakers環繞在床的四周，電腦主機則安放在靠床的地下，最重要的是那套無線keyboard與mouse就靠床而放。就是這樣，上網、睇電視、睇影碟、聽歌、工作也在床上。為了讓我工作更加舒服，我買了一張小型無腳的軟背摺椅，還有一張小型短腳摺檯，那些小型用品，收藏簡便，令我安然。 就這樣，我就變成了不落床的Sindy。這真像一個恐怖傳說…… 
不落床的Sindy外傳： 肥文是我弟弟的好友，有日他輕敲我房門，說要入來探望我，我隨聲說歡迎光臨，我正賴在床上看《奪寶奇兵》，他陪我看了一會，然後問我會否與他們結伴到海旁看「賀回歸」的煙花，我隨即指著靠床的那面窗說：「不用了，由這裡望出窗外，剛好看到煙花。要是看不清楚，就看電視直播。」我示意那個LCD monitor。肥文隨即激動地說：「姐，你要落床架！無朋友啦。」然後，我就拋下一句：「我的朋友都在MSN」最後，肥文搖著頭，離開了我，幫我關好房門。 |
| |
